Na’e me’a atu ‘a e Palemiá, Hu’akavameiliku ki Niua ‘i he Tu’apulelulu kuo ‘osí ke fai ha taufolofola ki he ‘Ene ‘Afio, Tupou VI. Ko ha kau Minisitā ‘e toko nima na’e kaungā folau mo e Palemiá: Lord Fohe, Lord Tu’i’āfitu, Dr. Viliami Latu, Fekita ‘Utoikamanu, pea mo Dr. Siale ‘Akau’ola. Na’e toe kau foki ‘i he kau folaú ‘a Dulcie Tei ‘o Tongatapu 6, pea pehē foki ki he Sekelitali Lahi, mo e Sekelitali ki he Kapinetí, Paula Ma’u.
Ko e ngaahi fakamahamahalo ki he ‘uhinga ‘o e folaú, ko ha kole fakamolemole mo e hū louifi ki he ‘Ene ‘Afio koe’uhí ko e tō kehekehe ne hoko he vaha’a ‘o e Tu’í mo e Palemiá. Kā, ko e me’a ‘eni ‘oku mahino mai, na’e ‘ikai ha hū louifi he na’e ‘ikai ha taha ia he kau folau na’e tui louifi.
Ko e tohi mei he Fakataha Tokoni ‘oku fai ki ai e tālangá na’e ‘ave ia he ‘aho 2 Fepueli, pea mama kitu’a ‘o mahino mei ai ‘oku ‘i ai e tu’u fehangahangai he ongo mafai pule, kae’uma’ā foki e lahifau hono tālanga’i he mitia, tautefito ki he mitia fakasosialé.
‘Oku mahino foki na’e ‘i ai e fetu’utaki mei he ‘Ofisi Palemiá ko ha tali e fetu’utaki mei he Fakataha Tokoni. Na’e ‘ikai foki ke ‘i ai ha fakaikiiki pe ko e hā e ‘uhinga ‘o e ta’efiemālie ‘a e Tu’í ki he ongo Minisitā; pea toe ‘ikai foki ha fakaikiiki ki he tohi tali ko ia mei he Palemiá.
Kā, ne hoko e me’a ni ke mahino ai e fa’ahi ua ‘o e fefusiaki fakapolitikale he fonuá. ‘I he tafa’aki ‘e taha, kuo ‘i ai e ni’ihi ‘oku nau tui kinautolu ‘oku tonu ke kei pule fakaleveleva pe Tu’i ki Tonga ni, pea ko e hā pē ‘ene faka’amu ‘oku tonu ia ke fai pau ki ai e muimui.
Ko e ni’ihi foki ‘eni ne nau loto kinautolu ke toe fakafoki pe ‘a Tonga ki he tu’unga kimu’a he liliu ‘o e 2010. Pea toe teke mālohi ha ni’ihi ia ke fakafoki ki he kuonga kimu’a ‘i he 1875, ke kei hoko pe faka’amu ‘a e Tu’í ko e lao.
‘I he tafa’aki ‘e tahá, ‘oku tokolahi ‘a kinautolu ‘oku nau tui ko Tonga ko e fonua Pule’anga Fakatu’i Faka-Konisitutone. Pea ko e talu hono fatu ‘o e Konisitutone ‘i he 1875, ‘oku kāpui mei ai ‘a e pule ‘a e lao – ki he Tu’í, ki he Hou’eiki, pea mo e kakaí kotoa.
Ko e liliu ko ia ‘o e 2010, ko hono toe fakalelei’i e Konisitutone ke lava ke toe fakatemokalati ange faunga pule ‘o Tonga, pea ne moimoi ai e mafai o e Tu’i ki hono fili e Palemiá mo e Pule’angá, ‘o ‘ave ia ki he Fale Aleá.
Na’e fai foki mo hono toe fakatokolahi e kau fakafofonga ‘o e kakai ki Fale Alea, emi he toko 9 ki he toko 17; kae kei tu’uma’u pe kau fakafofonga ‘o e Hou’eiki Nopelé he toko 9.
‘I he’ene pehē na’e finangalo ai ‘a e Tu’í, Hou’eiki mo e kakai ‘o e fonuá ke malava pe kau fakafofonga ‘o e kakaí ke nau fili e taki e Pule’angá, kau ki hono fakalele fonuá, mo toe tofa e halanga ki he fatu e lao ‘o Tongá.
Kaekehe, ko e ola mo e fakaikiiki ‘o e me’a ne hoko ‘i Niua ‘oku te’eki ai pe ke tukuange mai. Kā, kuo hoko ‘a e hangē koaa ‘oku ‘i ai e tu’u kehekehe ‘a e ongo mafai lahí, ko ha me’a ia ‘oku toe fai ai ha vakai makehe ki he fa’unga pule ‘o e fonuá. ‘Oku mahino mai mei he kotoa e ngaahi vakaí, ko e me’a koee ‘oku kei tu’uloa mo ma’olungataha, ko e pule ‘a e lao, ‘a ia ko hotau Konisitutone kuopau ke fai hono faka’apa’apa’i mo muimui pau ki ai.
‘E ‘i ai ma’u pe ‘a e tō kehekehe, kā ‘oku lava ma’u pe ke fai e fetu’utaki mo hano tālanga’i he melino mo e laumalie ‘o e fetukulolo’aki ‘o fakatatau ki he laó.
