‘I he ngaahi tālanga fekau’aki moe hū louifi ‘a e Pule’anga ‘oku tataki ‘e Hu’akavameilikú, ‘oku malanga hake ai e fehu’i ‘oku tuha ke fai hono fakakaukaua:
Ka faihala, pe maumau’i ‘e he ‘Ene ‘Afió ‘a e Konisitūtoné pe ko ha lao kehe ‘o e fonuá, ko e hā leva ‘a e me’a ‘e faí?
Mole ke mama’o ko hano tukuaki’i atu ‘eni e Tu’í ki hano maumau’i e Konisitūtoné pe ko ha lao kehe. Ka koe’uhí kuo ‘osi fakahā fakapule’anga ‘e he Kapinetí ki he kakai ‘o e fonuá ‘o pehē na’a nau ma’u e tu’utu’uni meí he ‘Ene ‘Afió pea “‘oku fepaki e tu’utu’uni ko iá moe kupu 51(3)(a) ‘o e Konisitūtone ‘o Tonga.”
‘Oku te’eki ke toe fakatonutonu mai ‘e he Pule’angá ni ‘a e anga ‘enau tuí ‘i he kaveingá ni. ‘Oku te’eki kenau fakahā fakapule’anga kuo liliu honau tu’ungá koe’uhi ‘oku te’eki fakafisi ha Minisitā meí he ongo Potungāue ‘oku fai ki ai e lauleá. Pea kapau ko e anga ia e vakai ‘a e Kapinetí, ‘oku totonu nai kenau faka’ilo ‘a ‘Ene ‘Afió ki he faitu’utu’uni ta’efaka-Konisitūtone?
‘Oku si’isi’i ha tui tenau fai pehē koe’uhi kuo talaki ‘enau hū louifi ki he Tu’í. Ko e angamahení, ‘oku faka’ilo ha taha ‘okú ne fakahoko mai ha tu’utu’uni ta’efaka-Konisitūtone. Ka ko ‘eni ia tenau ‘alu ‘o kole fakamolemole ‘i he loto mafesifesi, lo’imata’ia ‘i he fakatomala kakato, pea fakatōmape’e atu moe tangi halotulotu ki he tokotaha ‘oku nau tui na’e maumaulaó.
Neongo ‘oku ngali kauhala kehekehe ‘eni moe maama ‘o e sivilaisé, ka ko Tonga foki ia. Ko hono Konisitūtoné ‘oku fefūsiaki ai e Tukufakaholó pea moe ngaahi afo faka-Temokālatí. Ko e ongo me’á ni ‘oku ‘ikai tena kāinga (incompatible) ‘o hangē ko e vakai ki he vaí moe loló. Ko e mafao ange hono fusi’i e fo’i afo ‘o e Temokālatí, ko e mano’o ange ia e mafai faka-e-tukufakaholo ‘o e Tu’í ‘i he Konisitūtoné. ‘I he taimi tatau, ko e lahi ange hono fakakau ‘a e Tu’í ‘i he fakalele ‘o e Pule’angá, ko e vaivai ange ia ‘a e ngaahi afo ‘o e Temokālatí.
Ko hono toe fakalea ‘e tahá, ko Tongá ‘oku ‘ikai ko ha Pule’anga faka-Tu’i ‘ata’atā pe, pea ‘oku ‘ikai ko ha Pule’anga faka-Temokālati ‘ata’atā pe. Ko e tuifio ko ‘eni ‘a e vaí moe loló pea ‘oku meimei angauá, ‘o anga’i vai pea toe anga’i lolo. Pea ko e me’a ‘eni ‘e iku ki he feinga ‘a e Pule’angá ke tuifio e vaí moe loló, tenau iku kole fakamolemole ai ki he tokotaha na’a nau talaki na’e tu’utu’uni ta’efaka-Konisitūtoné.
‘O kapau ‘e ‘ikai hokohoko atu hono fakalelei’i e Konisitūtoné, pea ‘oku ‘amanekina e ngaahi Pule’anga kotoa ‘i he kaha’ú kenau angaua kotoa. ‘E hoko mai e Pule’anga ‘oku anga’i vai kae fiofio lolo. Pea ‘e ‘alu atu ia kae fetongi hake ‘e he Pule’anga ‘oku anga’i lolo kae namu vai. ‘Oku mo’oni ai e lau:
“…’Oku ou ‘ilo pē ho‘o ngaahi ngāué, ‘a e ‘ikai te ke momoko pe māfana. ‘Amusia ange ‘e au ‘okú ke momoko pe ‘oku ke māfana! Ka ‘i ho‘o pehé na, ‘o māmāfana pē…”
Mālō ho’o mou lelei pea mālō si’omou māmāfana mai mei hena.
