Kuo ma’u ‘a e Fili Si’i ki Vava’u 14 ‘e Dr. Mo’ale ‘Otunuku ‘o Longomapu, ‘aki ‘a e fo’i fili ‘e 709. Ko e fakahā ‘eni mei he ‘Ofisi Faifili ‘i Tonga ni.
Ko e fili foki ‘eni ‘a e sea ke fetongi ‘a Dr. Saia Piukala ‘a ia kuo hiki ia ke hoko ko e fakafofonga Pasifiki ki he WHO.
Ko e vahenga ‘o Vava’u 14 ‘oku kau ki ai ‘a e ngaahi kolo ‘2 23: ko Pangaimotu, ‘Utulei, ‘Utungake, Talihau, Taoa, Vaimalo, Tefitisi, Tu’anuku, Longomapu, Taunga, Kapa, ‘Otea, Falevai, Matamaka, Nuapapu, Lape, ‘Ovaka, Hunga, Holeva, Koloa, Olo’ua, Ofu, mo ‘Okoa.
Ko e toko 4 e kau kanititeiti ki he Fili Si’i ni, pea ne mahino ‘aupito e manakoa ‘o Dr. Mo’ale he lahi atu hono fika. Na’e fika 2 ki ai ‘a Fataua halatanu ‘o Hunga ‘aki ha fo’i fili ‘e 353, pea fika 3 ‘a Tinitale Piukala ‘o Pangaimotu ‘aki ha fo’i fili ‘e 316. Ko e muimuitaha pe fika 4 ko Fatanitavake Veikune mo e fo’i fili ‘e 312.
Ko ia kuo hoko leva ‘a Dr. Mo’ale ‘Otunuku ko e fakafofonga Fale Alea ki Vava’u 14.
Ko Dr. Mo’ale na’a ne faiako ha ta’u lahi ‘i Tonga mo Nu’usila, kimu’a ia peaa ne toe hoko atu ‘ene ako he ‘Univesiti ‘i ‘Okalani, ‘o ma’u ai hono ngaahi mata’itohi ma’olunga.
Na’a ne taki ‘i he Institute of Education’s Research and Development Program ‘o e ‘Univesiti ‘o e Pasifiki Tonga (USP).
(By-election for Vava’u 14 has been won by Dr. Mo’ale ‘Otunuku of Longomapu with 709 votes, followed by Fataua Halatanu with 353 votes, and Tinitale Piukala with 316 votes. Fatanitavake Veikune was last with 312 votes.)
