Supa Mario
EPISODE 1 – NE TUFA TANGIKĒ KOAA ‘A ‘IKANI TALIAI ‘I TONGATAPU 1?
Kuo hoko ‘o hangē ha to’ukai ‘o e loi kehekehé, ‘a hono fakahoko ‘i he to’ufili kotoa ‘a e ngaahi tukuaki’i ta’emo’oni. ‘Oku fakahoko angamaheni ‘eni ke fakangalikovi’i ‘aki ha kanititeiti Fale Alea pea ‘oku ‘ikai ke pehē kuo fakahoko pē meí ha fa’ahi fakapolitikale ‘e taha, ka ‘oku meimei tofuhia kotoa. ‘Oku fie puke ai ‘a e faingamālié ni ke fai ha lave ki ai, ‘i he faka’amu ke a’usia ‘e he kakai ‘o e fonuá ‘a e mo’oní.
Kuo fakahoko meí he mītia fakasōsialé ‘a hono tukuaki’i ‘o ‘Ikani Taliai, ka ko e Kanititeiti he vāhenga ‘o Tongatapu 1. Ko e tukuaki’i ‘eni ‘o fekau’aki pea mo e silini tokoni ‘a e vāhengá ‘o pehē ne ‘ikai ‘omi ia ki he fakafofonga, Siaosi Pohiva ka na’e ‘omi koaa ki a ‘Ikani kene kemipeini tufa tangikē vai ‘aki. Ne toe tukuaki’i foki ‘o pehē kuo ‘osi ‘a Sopu hono fakatangikē, ‘alu hake ‘eni ki Halavave pea ngalingali ‘e a’u atu ki Kolommotu’a. Ne toe fakalea foki ‘o pehē ne tuku ai pē ‘e he Fakafofongá ke ‘aonga ki hono vāhenga.
Ko e natula ‘o e tukuaki’í ni ‘e ‘ikai ongo ia ki ha kau kanititeiti ‘oku nau fakahoko ‘a e founga kemipeini ko ‘eni ‘o e tufá. Ka ‘e ongo ia ki a ‘Ikani Taliai koe’uhi ‘oku ‘ikai ko ha founga kemipeini ‘eni ‘okú ne poupou’i, ke tufa ha ngaahi koloa pe pa’anga ke fakatau ‘aki e fili ‘a e kakaí ma’ana.
Koe’uhi ko e tukuaki’í ni ne ‘ikai ‘omi fakataha ai ha fa’ahinga fakamo’oni, ne fakahoko ai e fetu’utaki hangatonu ‘a e polokalamá ni ki he tokotaha ‘oku ha’ana e tukuaki’í. Na’á ne fakahā ko e taha he ‘api ne o ‘o savea tangikē pea tala ange hangatonu kia kinautolu, ko e tokoni ‘a ‘Ikani. Pea ‘oku pehē foki pea mo ha ngaahi fāmili ‘i Sopu pea mo Hala’ovave. Ne ‘ikai tuku mai e ngaahi hingoa ‘o e kau ma’u’anga fakamatalá ni.
‘I hono toe fakalea ke mahino ange, ‘i he a’u mai ki he mōmeniti hono teuteu’i ‘a e ki’i polokalamá ni, ne te’eki ke ma’u mai ha fakamo’oni ke poupou ‘aki ‘a e tukuaki’i kuo fakahoko. Ka ‘e hokohoko atu pe hono muimui’i. ‘I he taimi tatau, ne toe fakahoko mo ha fetu’utaki ki a ‘Ikani Taliai ke ‘omi ha’ane tali ki hono ngaahi tukuaki’í. Na’á ne faka’ikai’i kotoa ‘eni. (Vakai ki he video ki he tali ‘a ‘Ikani)