Mahalo ‘oku kei manatu e tokolahi ki he Komiti Fakafonua Fakafepaki Faihala, pe KFFF. Ko e komiti ‘eni ne takitau mai ai ‘a Clive Edwards pea mo ha ni’ihi kehe ‘o fakalele ‘enau ngaahi polokalama letio.
Na’e fakataumu’a ‘eni ko hono fakafepaki’i koaa ‘a e faihalá. Ka kuo ‘i fē nai he ngaahi ‘ahó ni ‘a Clive pea mo ‘ene fakafepaki faihalá? ‘Ikai nai ko Clive ‘eni ‘oku taaimu’a holo hono tifeni e faihala ‘a e ‘Enisiniá?
Na’e ‘i ai ha ni’ihi pau he kau fakaanga ‘o e Pule’anga kuo’osí ne fakahoko pē koe’uhi ko e sino ‘o ‘Akilisi (RIP).
Na’e ‘ikai makatu’unga mo’oni ia he faihalá ‘o hangē ko ‘enau laú. ‘O kapau ‘e fakatotolo hake e ni’ihi ko ia he ngaahi ‘ahó ni, ko kinautolu ‘eni ‘oku si’i fai hono tifeni mo ta’ota’ofi ha toe lea ki he faihala ‘a e ‘Enisiniá.
Kae mahalo na’a faka’uhinga ha ni’ihi ‘o pehē ko Clive ia ko e loea pea ‘oku fakahoko pe hono fatongia fakalao ‘i hono mala’e pea mo hono taukei. Ka ‘o kapau ‘oku ngāue’aki e taukeí ke ‘aofi ‘aki e faihalá, kuo hā leva e fakafepaki’i ia ‘o e faihalá?
Mole ke mama’o na’a pehē ko Clive pe ‘oku fai ki ai e talanoa. Na’a mo e lotofale tonu ‘o e PTOA ‘aee ‘oku toutou malanga’i mei ai e vīsoné, ko e lotofale tatau pē ‘oku fa’a tukuaki’i mei ai ‘a hono kalusefai ‘o e vīsoné. Pea ‘oku toe mālié, he ‘oku talamai ‘e he kau poupou ‘o Siaosi Vailahi Pohiva ko e vīsoné e ‘oku mavahe ‘a Siaosi ‘o ngāue’i.
Ka ‘i he taimi tatau, ‘oku pehē ‘e he kau poupou ‘o e Coreteam Ptoa, ko e vīsoné ‘eni
‘oku nofo atu a Misi Sika moe toengá he Coreteam.
Ka ko e fo’i losika faingofua ‘eni ‘e ala fakavetevete ‘aki:
‘E ‘ikai tena fakatou tonu loua ‘o kapau ‘oku na fepakipaki. ‘E malava ke tonu ‘a e taha kae hala e taha. Pea ‘oku toe malava ke na fakatou hala loua.
Ko e poini – ‘oku faka’au ke lahi ‘a e kau Fālesí (hypocrites) ‘i he Politiki. Ko e me’a ‘oku fakalolomá, ko e ikai fa’a fakatokanga’i ‘e he tama Fālesí ‘a ‘ene fepakipaki.
Kuo mahino ta’etoeveiveiua e tonounou ‘a e tataki ‘o e Pule’anga lolotonga. Kuo a’u ki ha tu’unga ke faka’uhinga’i e Konisitūtoné ke kei Minisitā ‘a e faihiá mei pilīsone.
Ka ko hai ha kakai totonu ke fili kene fetongi kinautolu? ‘Oku fai e manavasi’i na’a tuku kitu’a e Fālesi kae fili atu e Fālesi fo’ou kene fetongi. Pea ‘e iku nifi ‘eni kae nafa e…
