‘Oku tālanga’i lahi he fonua ‘a e me’a ne hoko he ‘apiako ngoue ‘a e Siasi Uesiliana ‘i ‘Eua, ko Hango. Ko e me’a ne hoko ko hono taa’i ‘e he faiako ko Viliami Vea ha tamasi’i ako, pea fakatatau ki he me’a na’e hā he vitio hono faitaa’i, na’e hulufau e tā, pea fai laumalie ‘ita mo fakapo’uli.
Na’e ui atu e faiako ki he tamasi’i ako ke ha’u ki ai, pea ne to e va’a papa ‘o taa’i’aki hono tu’a. Pea ne toe tu’u ki ‘olunga ‘o hoko atu ta he tu’a, lele tamasi’i, kae ta pe ‘o to ki lalo, pea hā hono taa’i e tau’olunga. Na’e to e ki’i tamasi’i ki lalo ‘o tangi kole fakamolemole, kae hoko atu pe tā.
Ko Viliami Vea ko e faifekau ia he Siasi Uesiliana Tau’atāina ‘o Tonga. ‘Oku ‘ikai foki ke ngofua fakalao ki ha faiako ke ne ala ‘o taa’i ha tamasi’i ako. Ko e lao ia ‘a Tonga ni he ‘aho ni.
Kā, ‘oku mahino mei he ngaahi fakamatalá ko Viliami Vea, ko e tokotaha fa’a tā, ka ne te’eki ai ke launga’i ia ‘e ha taha.
Kaekehe, ‘oku lahi ‘aupito ‘a e ngaahi fetu’utaki fekau’aki mo e faifekau ke tuli, ke fakafisi, ke fai ha ngaue fakalao ki ai. A’u ia ki ha ui ki he ngaahi fa’e ke nau laka fakahāhā pea fai ha ngāue ki he kau Polisi ke omai ‘o puke ‘o faka’ilo ‘a Viliami Vea.
‘Oku te’eki ai foki ke tuku mai ha fakamatala ia meia Viliami Vea fekau’aki mo e me’a na’e hoko. Pea te’eki ai ke tuku mai mo ha fakamatala fekau’aki mo e talavou na’e taa’i, pe ‘oku lavea pe ‘ikai. Ko e talavou mei ha famili Lapaha.
Neongo e lahi fau e ngaahi ui ke fai ha ngaue kia Viliami Vea, kā ‘oku ‘i ai pe ha tokosi’i ‘oku nau pehē ‘oku “sai pe taa’i ke poto”. Pea ko e tā ia ko e me’a ne fai mai ‘i Tonga ni he ngaahi ako’anga ‘o poto ai to’utangata kimu’a.
‘Oku ‘i ai e kau vāofi kia Viliami Vea ‘oku nau poupou pe ki ai, pea ko e fakamatala ia ‘e taha ne pehē koaa na’e launga e ki’i tamasi’i ia ki he faifekau ‘o pehē ‘oku ne hela’ia. Ko e tu’u ‘a e lao, pehē pe ki he anga fakalotū, ‘oku ‘ikai pe ke lava ke fakatonuhia’i ha tā vale ia mo fakapo’uli, tatau aipe pe ko e hā e ‘uhingá.
Kaekehe, ko e me’a ‘oku fai ki ai e fakatatali pe ‘e faka’ilo e faifekau ‘e he famili? Pea ko e ha e me’a ‘e fai ‘e he ‘apiako, kae ‘uma’ā foki ‘a e Siasi Uesiliana ki he’enau faifekau na’e ‘ikai pe ngata he’ene maumau’i e lao, kae fai e tā fakavalevale na’e mei hoko ai ha fakatu’utamaki lahi, pea ‘ikai foki ke hoa mo ha ‘ulungaanga fakafaifekau.
